|
پاکستان دی ستر فیصد ابادی زراعت نال منسلک اے،پر زراعت نوں اہمیت کیوں نہی؟
لیکھک :اختر نعیم
|
|
1980 دی دہائی بچ صوبہ سرحد بِچ ایوان زراعت دی بنیاد رخی گئی، حاجی عمر خان آف چارسدہ صدر، اکرام اللہ خان درب ہاؤس سیکرٹری بنڑ گئے، ہر ڈویژن توں ہک ہک نائب صدر بڑایا گیا۔ ہزارہ ڈویژن توں رستم خان ایڈووکیٹ نائب صدر بنڑے۔
اسی ویلےضیاءالحق مرحوم دی حکومت آسی، حکومت نے ہک فیصلہ کِیتا کہ زرعی پیداوار تے ٹیکس لایا جُلے(زرعی ٹیکس) ۔
حکومت دے اس فیصلے زرعی طبقے بچ بے چینی پھیل گئی۔ چنانچہ اس ویلے پورے پاکستان دے کسان تے زمینداراں نے اتحاد کیتا، راولپنڈی دے ہک ہوٹل بچ پریس کانفرنس ہوئی جس بچ صوبہ سرحد توں حاجی عمر خان تے انہاں دی ٹیم، پنجاب توں بیگم حسین علی احمد تے ٹیم۔ سندھ توں عبدالستار ڈیتھو، بلوچستان توں غوث بخش رئیسانی نے شامل ہونڑا آسا ورے انہاں دی جگہ تے کوئی ہور شامل ہویا آسا، اسی طراں آزاد کشمیر دی نمائندگی کرنا والے دا ناں بی یاد نہی۔
مقررین نے تقریراں کِیتیاں ورے بیگم حسین علی احمد دی تقریر نمایاں آسی۔ انہاں نے آخیا کہ کاشتکار تے زمیندار پہلے ای ٹیکس دے پَہَار تلے دبے دے ہن۔جہڑے کہ چودہ ہن جد کہ کسی ہور شعبے بچ اتنے زیادہ ٹیکس نہی۔ حکومت آپڑیں فیصلے تے نظر ثانی کرے ورنہ زرعی طبقہ احتجاج تے مجبور ہو جُلسی۔
اسی آپڑیں زمیناں بِچ اتنی کنڑک(گندم) لاساں جہڑی کہ اساں دی ذاتی ضرورت ہوسی باقی زمیناں بنجر چھوڑ دیساں، فر دیخساں کہ فلور مِلاں کس طراں چلدیاں ہن۔
اسی آپڑیں زمیناں بچ اتنی کپاس لاساں جہڑی اساں دے کَہار دی ضرورت ہوسی، اسی کَہار دی کھڈیاں تے آپڑیں ضرورت دا کپڑا تیار کرساں فِر دیخساں کہ ٹیکسٹائل مِلاں کس طراں چلدیاں ہن۔
اسی گَنا اتنا کاشت کرساں کہ جس نال اسی ذاتی طور تے گڑ تیار کرکے استعمال کرساں فر دیخساں کہ شوگر مِلاں کس طراں چَلدیاں ہن۔اسی طراں باقی زرعی اجناس بی آپڑیں ضرورت دے مطابق کاشت کرساں۔ اس موقعے تے مرکزی ایوان زراعت دی تشکیل ہوئی اور عہد کیتا گیا کہ پاکستان دی ساری تنظیماں مل جل کے زرعی طبقے دی فلاح واسطے کم کرساں۔
لازمی گل اے کہ اس طراں دے پروگراماں بچ خفیہ دے نمائندے بی ہوندے ہن۔ اس پریس کانفرنس دیاں گلاں حکومت تک پہونچیاں تے صدر مملکت ضیاءالحق صیب سُنڑ فوری طور تے زرعی طبقے دے نمائندیاں نوں ملاقات واسطے بلایا۔ ملاقات توں بعد حکومت نے فیصلہ کیتا کہ بجٹ بچ زرعی ٹیکس شامل نہ ہوسی۔ یعنی زرعی طبقے دے اتحاد دی وجہ نال حکومت زرعی ٹیکس نہ لانڑاں تے مجبور ہوگئ۔ایہہ بڈی کامیابی آسی۔
حکومت نوں زرعی طبقے دی اہمیت دا اندازہ ہوگیا۔ایہہ کوئی معمولی گل نہ آسی۔
فر اس طراں ہویا کہ زرعی طبقےبچ کُج نا اتفاقی پیدا کیتی گئی، یعنی کُج زرعی طبقے دے ذاتی مفادات ہوگئے تے سارے آپڑیں تنظیماں دے پاسے ہوگئے تے زرعی طبقے دی مشکلات زیات ہوگئیاں۔ ہونڑ آئے دن کدی کپاس کدی گَنے تے کدی کنڑک وغیرہ کاشت کرنا والے پریشانی دا شکار ہوگئے، زرعی مداخل مہنگے ہوگئے جس دی وجہ نال کدی کنڑک درآمد ہوندی اے، کدی چینی تے کدی ہور چیزاں۔ ایہہ کوئی چنگی گل نہی۔ حکومتی پالیسیاں بی زرعی طبقے دے مفادات نوں مدنظر رَخ کے نہی بڑائی جُلدی لازمی گل اے کہ زرعی طبقہ پریشان تے ہوسی۔
جس طراں کہ میں عرض کیتا کہ پاکستان دی ستر فیصد ابادی کسی نہ کسی طراں زراعت نال منسلک اے تے اساں دا میڈیا بی اس حوالے نال مثبت کردار ادا نہی کردا۔ پہلے ریڈیو تے زرعی پروگرام ہوندے آسے تے ہونڑ ایف ایم چینل بی مُچ سارے ہن ورے زرعی پروگرام نہ ہونڑاں دے برابر۔ ٹیلیویژن چینل بی مچ سارے ہن ورے کتنے چینل ہن جہڑے کہ اس حوالے نال زیات ٹیم دیندے ہن۔ ضرورت اس گل دی اے کہ میڈیا اس سلسلے بچ مثبت رول ادا کرے، عام کاشکار کولوں بی جل کے پُچھے کہ انہاں دے اصل مسائل کہہ ہن۔ صرف زرعی ماہرین یا چند رہنماواں تو پُچھڑاں نال مسئلہ حل نہی ہوندے۔
دیخیا جُلے کہ ہور مُلخاں بچ زراعت دے حوالے نال کہہ پالیسیاں ہن، اُتھے کاشتکاراں نوں کس طراں دی سہولت ملدی اے۔انہاں نوں مدنظر رخ کے پاکستان دے دے زرعی طبقے واسطے پالیسی ہووے۔ جد تک زراعت بچ ترقی نہ ہوسی معیشت چنگی نہی ہوسکدی۔
|
|
|
